Publisistika sahəsində də Üzeyir Hacıbəyov irsi təkrarsızdır. Qori müəllimlər seminariyasında təhsil aldığı illərdə onun publisistik, jurnalistik istedadı özünü biruzə vermişdir. 1903-cü ildə Tiflisdə Məhəmmədağa Şahtaxtlı tərəfindən nəşr olunan "Şərqi-rus" qəzetində Ü. Hacıbəyovun "Dəllək" adlı nəzmlə yazılmış felyetonu dərc edilmişdir. Felyetonda seminariyada baş verən bir əhvalatdan bəhs olunmuşdur. Felyetonu M. Şahtaxtlı çox bəyənmiş və gənc Üzeyirə qələmi əlindən yerə qoymamağı tövsiyə etmiş, gələcəyinə böyük ümidi olduğunu söyləmişdir.

Ü. Hacıbəyov publisistik yazılarını 64 gizli imza - "Filankəs", "Birşəxs", "Behmankəs", "U", "Ü", "Üzeyir", "Bisavad" və i. a. imzalarla dərc etdirmiş, "Ordan-burdan", "O yan, bu yan", "Dərədən-təpədən" və s. bu kimi sərlövhələr altında özünün duzlu, məzəli, kiçik yumorlu, kəskin gülüşlü felyetonlarını yazmışdır.

Üzeyir Hacıbəyov aktiv, bacarıqlı, mühərrir olmaqla yanaşı, həm də təşkilatçı idi. O, dörd qəzetdə redaktorluq etmişdir. 1909-cu ildə Bakıda "Həqiqət" qəzeti nəşr olunurdu ki, onun naşiri və baş redaktoru Üzeyir bəy idi. Bundan əlavə o, "Tərəqqi", "Yeni iqbal" və "Azərbaycan" qəzetlərinin də rəhbəri olmuşdur.