Dəstə isə xorla oxuyardı:
Xıdırı-Xıdır Ilyas,
Özünü yetir Ilyas.13
Yenə bir nəfər oxuyardı:
Xıdır gəldi hayınan
Bir balaca dayınan.
Dayça batdı palçığa
Çıxartdıq hay-hayınan.14
Dəstə xorla:
Xıdırı – Xıdır Ilyas,
Özünü yetir Ilyas.
Dəstədən bir nəfər:
Qara toyuq qanadı
Kim vurdu, kim sanadı.
Qapı-qapı gəzməkdən
Baldırım it daladı.15
Dəstə xorla:
Xıdırı-Xıdır Ilyas,
Özünü yetir Ilyas.
«Xıdır payı»ndan ertəsi günü yağla kömbə bişirər, qovut çəkilər və dəstənin üzvləri arasında bölünərdi.
Kiçik Qafqazın cənub-şərq rayonlarında (Laçın, Qubadlı, Zəngilan, Kəlbəcər, Cəbrayıl və Füzuli rayonları nəzərdə tutulur) «Xıdır Ilyas» bayramı özünəməxsus mərasimlərlə qeyd olunurdu. Rus tədqiqatçısı T.F.Aristova Laçın, Qubadlı və Zəngilan rayonlarında bu bayramın qeyd edilməsi prosesləri haqqında maraqlı məlumat verir. Qışın ortalarında keçirilən bu bayramda azərbaycanlı qadınlar ailəsinin salamatlığı üçün sacda qovurğa qovurar, çay və bulaq kənarında müxtəlif rənglərlə bir neçə yumurta qoyaraq niyyət edirdilər. Ertəsi gün yumurtalara baxırdılar. Əgər yumurta qırmızı rəngə boyanmışdırsa yaxşı, qara boyanırdısa pis əlamət yozurdular.16
Kəlbəcər rayon sakini Əhməd Fətəliyev məlumat verdi ki, Qılıncı kəndində kiçik çillənin çıxmasına 15 gün qalanda «Xıdır Ilyas» bayramı qeyd olunardı. 10-15 nəfərlik dəstələrlə qapı-qapı gəzib bayram hədiyyəsi yığardıq. Hər evə çatanda xor ilə «Xıdır» nəğməsi oxuyar və oynayardıq. Əvvəlcə bir neçə nəfər oxuyardı:
Xıdır gəlir haynan-huynan
Altında bir qara daynan.
Qara day palçığa batdı,
Xıdır yanında yatdı.
Dəsmal verin bağlayaq.
Yenə dəstədən bir nəfər:
Xıdır Nəbi, xan Ilyas,
Açdı çiçək, gəldi yaz.
Mən Xıdırın quluyam,
Boz atının çuluyam.
Xor təkrar edirdi:
Xıdır Ilyas, Xıdır Ilyas,
Açdı çiçək, oldu yaz.
Dəstədən daha bir nəfər:
Xıdır getdi hayınan,
Bir balaca dayınan.
Dayı palçığa batdı,
Xıdır yanında yatdı.
Xor:
Xıdır Ilyas, Xıdır Ilyas,
Açdı çiçək, gəldi yaz.
13. Yenə orada.
14. Yenə orada.
15. Yenə orada.
16. T.F.Aristova. Kurdı Zakavkazğə. M., Nauka. 1966.s.177.
